Croeso i Trywydd

Ffrwyth prosiect Ewropeaidd a gychwynnwyd yn 2002 yw Trywydd. Cyflogodd prosiect ‘Dewis’ gyfieithwyr a chyfieithwyr ar y pryd i weithio gyda chymunedau Sir Gâr er mwyn cynnig gwasanaeth cyfieithu fforddiadwy iddynt. Y nod oedd annog y defnydd o’r Gymraeg ymhlith unigolion, cwmnïau a mudiadau’r sir.

Ar ddiwedd y prosiect yn 2008, ac wedi i’r cyfieithwyr ennill enw rhagorol yn y maes yn lleol, ail-frandiwyd y gwasanaeth a sefydlwyd cwmni Trywydd, a hynny o dan reolaeth Menter Dinefwr. Nod Trywydd oedd datblygu’r gwasanaeth cyfieithu hwn ymhellach a sefydlu gwasanaeth ymgynghori newydd, gan weithio ar lefel broffesiynol ar hyd a lled Cymru.

Mae Trywydd bellach yn gwmni cyfyngedig trwy warant, rhif 6859582. Mae’n ymfalchïo yn y ffaith ei fod yn fenter gymdeithasol – mae holl elw’r cwmni’n cael ei ail-fuddsoddi yn natblygiad Trywydd a’i chwaer-gwmni, Menter Dinefwr.

Owain Siôn Gruffydd yw Prif Weithredwr Trywydd, a Catrin Parry Williams yw’r Rheolwr Gwasanaethau Corfforaethol. Mae gan y cwmni Fwrdd Rheoli etholedig.